अमेरिकामा ८ नेपाली विद्यार्थी पक्राउ

जालसाजी गरी डिपेन्डेन्टलाई अमेरिका पुराएको अभियोगमा अमेरिकाको केन्सास राज्यमा ८ जना नेपाली विद्यार्थी पक्राउ परेका छन् ।

पक्राउ पर्नेमा ३३ वर्षीय महेन्द्र थापा, ४१ वर्षीय खेम आचार्य, ३७ वर्षीय राजकुमार दानी, ४१ वर्षीय लीलाबल्लभ पाण्डे, ३७ वर्षीय लक्ष्मण पोखरेल, ३८ वर्षीय केशर प्रसाई, ३२ वर्षीय गोविन्द पनेरु र ४३ वर्षीय नारायण चापागाई रहेका छन् ।

अभियोग लगाइएका ३७ वर्षीय सन्तोष घिमिरेले भने अमेरिका छाडिसकेका छन् । केन्सास राज्यका न्यायाधीवक्ता ब्यारी ग्रिसमले विद्यावारिधि गरिरहेका ९ जना नेपाली विद्यार्थीमाथि ५ वर्ष अघि डिपेन्डेन्टलाई अमेरिकी भिसा दिलाउन जालसाजी गरेको अभियोग लगाएका छन् ।

राज्यको न्यायाधिवक्ता कार्यालयबाट मंगलबार जारी अभियोग पत्रअनुसार सन् २००८ मा ति विद्यार्थीले आफ्नो आर्थिक हैसियतसम्बन्धी दस्तावेज तयार गर्दा जालसाजी गरेका थिए  ।

'उनीहरुले आफ्ना सहपाठीसँगै रकम लिएर खातामा जम्मा गरे र बैंक खातामा रहेको रकम आफ्नै भएको दाबी गर्दै त्यसैका आधारमा कागजपत्र निकाले अभियोगपत्रमा भनिएको छ ।' 'भिसा पाएपछि त्यो पैसा उनीहरुले सहपाठिहरुलाई नै फिर्ता गरे ।'

अभियोग प्रमाणित भएमा हरेक विद्यार्थीले फेडेरल जेलमा कम्तीमा १० वर्ष कारावास र २ लाख ५० हजार अमेरिकी डलरसम्म जरिवाना तिर्नुपर्ने हुनसक्छ ।
श्रोतः अन्नपूर्ण पोष्ट